Subong nga adlaw dapat kuntani magaabot si Presidente Ferdinand Marcos Jr. para sa paglunsar sang Oplan Kontra Baha nga programa ugaling bangud sang hana nga pagsulod sang bagyo Wilma sa Visayas wala siya madayon.
Pero, nag padayon ang programa kaina sang aga sa may Mambuloc Creek malapit sa reclamation area sang Bacolod.
Halin sa mga river warriors sa idalom sang Tupad sang DOLE ang nag bulig sa pag tinlo sang creek.
May ginpadala man ang DPWH nga amphibious excavator nga amo ang makapadasig sang paghawan.
Makita sa creek ang nagkalain-lain nga mga plastic nga basura nga naga bara nga mano-mano nga ginpangkuha.
Ang excavator naman ang nagkuha sang mga lunang kag mga bato nga nag bara na sa creek.
Suno kay Congressman Albee Benitez, luyag kuntani masaksihan sang president ang ginhugpong nga pwersa sang gobyerno kaupod ang pribado nga sector para malubad ang problema sa baha.
Para naman kay Mayor Greg Gasataya, kinahanglan ang pagbuligay sang tanan para malubad ang problema.
Ang basura ang isa lamang sa madamo nga rason sang paglala sang baha sa siudad.*