P45 million pesos para sa anum ka mga banwa kag siudad sa Negros Occidental nga na igo sang Bagyo Tino ang gin-release.
Kahapon sanday Tourism Secretary Christina Frasco kag Education Secretary Sonny Angara nga nagtiglawas kay Presidente Ferdinand Marcos, Jr., ang nagbisita sa mga banwa kag siudad sa Negros Occidental nga na halitan sang bagyo Tino.
Sa gin patigayon nga inter-agency relief inspection gin-announce ang pag release sang tig P10 million pesos bilang immediate assistance kag suporta sa rehabilitation sa La Carlota City, La Castellana kag Moises Padilla.
Tig P5 million pesos naman para sa Binalbagan, Hinigaran kag Isabela.
Kabahin man sa ginpanagtag ang family food packs, family kits, kag hygiene kits. May mga jerry cans man kag mga bulong kasubog man mga shelter grade tarpaulins nga maga serbe temporary shelter sa mga apektado nga barangay ang gin pang hatag.
Nalakip sa mga gintalakay ang padayon nga restoration sang mga access roads, linya sang kuryente kag mga public facilities.
Sa La Carlota City isa sa mga labing na apektuhan ang agrikultura kag ang industriya sang kalamay nga gina kabig backbone sang ekonomiya sang siudad.
Sa La Castellana ginbisitahan nila ang nag collapse nga Buhangin River “Wipe-Out Bridge” nga naga serbe nga access route sa mga barangay nga yara sa kabukiran. Ginpadangat man ang sitwasyon sang mga tourism sites nga labing na apektuhan sang pag baha.
Sa Moises Padilla ginbisitahan ang riverside area sang Barangay Poblacion isa sa mga labing apektado nga komunidad sang mag luntad ang pag baha.
May P8.298 million pesos ang balor sang kabilugan nga food packs kag nagkalain-lain nga mga kits nga nahatag sa apat ka mga LGU sang kahapon.
Damlag pa may P50 million pesos na nga pondo nga gin-allocate para sa probinsya bangud sang bagyo Tino.*