Sang Martes lang naka-graduate ang 27-anyos nga Patrolman sa ila Basic Internal Security Operations Course sa Santa Catalina, Negros Oriental kag sini nga Biyernes sang kaagahon, siya ang napatay matapos gin-alegar aksidente nga matiruhan ang iya kaugalingon.
Nagluntad ang insidente sa gwa sang isa ka balay sa Barangay Caranoche, banwa sang Santa Catalina, mga las 12 sang tungang gab-i, samtang naga-inom-inom ang biktima upod ang pila niya ka mga kilala.
Nagwa sa imbestigasyon nga nagkuha sang 9mm nga pusil ang patrolman kag ginpakita kung paano ini gamiton. Apang samtang gina-uyatan niya ang pusil, naglupok ini kag naigo ang biktima sang bala sa agtang.
Gindala ang patrolman sa Bayawan District Hospital apang gindeklarar nga dead on arrival.
Isa ang patrolman sa 160 ka police personnel sang class “MASIGALIG” nga nakatapos sang BISOC sadtong Nobyembre 10. Siya karon na-assign sa Regional Personnel Holding and Accounting Unit.
Nagpanugyan naman si Police Captain Stephen Polinar, spokesperson sang Negros Oriental Police Provincial Office sa mga police personnel nga ipasuguro ang safety sang ila mga armas.
[sibwp_form id=1]