Pat-od nga plano para sa limited kag voluntary in-classroom learning ginaduso; suporta para sa kinahanglanon sa blended learning ginapanawagan man
Katapo sang Bacolod City Public Schools Teachers Federation may pila ka mga demanda karon nga manug bukas ang klase sa Lunes.
Una nila nga ginahinyo ang pat-od nga plano sa pagpatigayon sang limited and voluntary in-classrom learning.
Suno sa grupo ang Pilipinas kag Venezuela na lamang ang nabilin nga pungsod nga wala naga patuman sang face to face classes.
Suno kay Richard Gelangre ang presidente sang grupo, kun tutukan sarang ini nga mapatuman sa mga eskwelehan nga yara nahamtang sa mga isla. Ang ginaduso nila amo nga dapat may matun-an ang mga estudyante, bangud sa sitwasyon subong, ang masami ang ginikanan ukon iban ang naga sabat para sa mga kabataan sa ila nga mga pagtulun-an.
Pagpanghangkat man ang kakulang sang resources indi lamang sa mga estudyante suno sa grupo kundi pati man sa mga manunudlo.
Ehemplo diri ang kakulang sang mga tablets bisan ma cellphone. Wala labot diri, panawagan man sang grupo ang pagpangapin sa ikaayong lawas sang mga manunudlo rason nga naga panawagan sila sang santo nga mga benepisyo.
Suno kay Gladys Amylaine Sales, Bacolod City Schools Division Superintendent, matuod nga may kasubong nga mga pagpanghangkat, pero ginatinguhaan man sang gobyerno nga masabat ang mga ini.
Pero indi man ma negar suno sa iya ang sitwasyon sang pungsod kun sa diin ang resources naga depende sa buwis nga matipon kag sa foreign loans.