Ginbalabagan sang otoridad ang isa ka 62-anyos nga pasahero matapos madiskubrehan ang P13.7M nga balor sang ginasuspetsuhan shabu sa sulod sang iya hand-carry baggage sa Ninoy Aquino International Airport Terminal 3, Miyerkules nga adlaw.
Nakasulod sa box sang isa ka powedered milk supplement ang iligal nga droga nga nagabug-at sang masobra duha ka kilo.
Nagsuspetsa ang mga otoridad sa x-ray screening sang makita ang karton nga nakasulod sa pink nga bag.
Ginkumpirmar sang K9 paneling kag field testing sang Philippine Drug Enforcement Agency nga ang na-recover sa senior citizen isa ka shabu.
Nakaschedule kuntani nga magsakay sa eroplano ang babaye padulong Bacolod-Silay International Airport.
Suno sa PDEA, magluwas sa shabu, nakuha man sa babaye ang isa ka cellphone, digital weighing scale, travel documents kag identification cards.
Bangud padulong Bacolod-Silay Airport ang pasahero, wala ginadula ang posibilidad nga diri sa Bacolod ukon Negros Occidental igadal-on ang iligal nga droga.
Ginsiling ni Bacolod City police director Col. Joeresty Coronica nga madamo ang posible scenarios sa pagka-intercept sa pasahero.
Posible suno sa iya nga una ini nga pag-attempt nga mag-transport sang iligal nga droga kag posible man nga wala makahibalo ang tigulang nga may unod gali nga iligal nga droga ang ginpadala sa iya.
Apang, sa bahin sang BCPO, sila ang padayon sa pagpangdakup sang mga nagapakigbahin sa gihapon sa iligal nga aktibidad, rason nga sang tinalikdan nga semana, suno kay Coronica, may masobra apat ka kilo nga iligal nga droga ang nakumpiskar sa Bacolod bangud sang ila ginpatigayon nga mga buy-bust operations.
Suno naman kay Police Capt. Judesses Catalogo, spokesperson sang Negros Occidental Police Provincial Office, indi sila makaha-um ha-um kun diri gid man bala iga-distribute kuntani ang mga kontrabando.