Pamuno sang Provincial Disaster Management Program Division ang ginpapanaugan sang show cause order angut sang gina alegar wala ma liquidate nga 3 million pesos nga gin-release nga financial assistance kasubong man conflict of interest.
Suno kay Provincial Legal Officer Alberto Nellas, Jr., ginpapanaugan ni Provincial Administrator Rayfrando Diaz si PDMPD Head Zeaphard Caelian sang show cause order para mag paathag sa gina siling wala ma liquidate nga assistance nga gin release sa isa ka Civil Society Organization sadtong 2017 pa. Ang 3 million pesos ang para sa training kag procurement sang equipment angut sa disaster response. Pero may gina lantaw nga conflict of interest suno kay Nellas bangud nga naga serbe man si Caelian nga katapo sang Board of Directors sang amo nga CSO kun sa diin base sa dokumento nagbaton sang sweldo ang katapo sang BOD. Sang amo nga tion si Caelian ang pamuno man sang PDMPD.
Nabaton ni Caelian ang show cause order sadtong Nobyembre 14 kag nakasabat na siya. Suno kay Nellas iya gin himutig ang mga alegasyon. Nagpamalibad naman si Caelian sa pag hatag sang pahayag sa katapo sang media.
Gina paabot naman ang pag pa gwa sang recommendation sang Provincial Legal Office – ini kun may basehan ang pagpasaka sang kaso administratibo batuk kay Caelian nga sa karon padayon nga naga report bilang pamuno sang PDMPD.
Sa pihak nga bahin, sa 13 ka mga driver sang PDMPD nga gin papanaugan sang show cause order bangud sang wala nasunod nga rekisitos sa mga trip ticket, 12 ang gin-terminate ang contract.
Sila ang yara sa idalom sa Contract of Service kag ang isa ka driver nga regular naman nga empleyado ang gin pasakaan sang grave misconduct nga kaso. May duha ka iban pa nga empleyado sang PDMPD ang pormal nga ginpasakaan sang kaso nga grave misconduct kag neglect of duty, pero ang isa diri nga casual ang appointment ang indi na pag i-renew, ang regular naman nga empleyado ang nag resign.
May isa pa gid ka regular kag isa casual nga empeyado nga pormal man nga gin charge sang grave misconduct. Ang casual ang nag resign. Damlag pa sila ang gin usisa angut sa mga reklamo angut sa ila nga bahavior sa trabaho.