Pamuno sang CENECO Union of Rational Employees ukon CURE nagpahayag nga indi iligal ang ila gina plano nga pag-strike kag wala man sang may naga-impluwensya sa ila tuyo nga pag-angkon sang benepisyo pinaagi sa Collective Bargaining Agreement.
Indi pa mapat-ud kun dayunon sang CENECO Union of Rational Employees ukon CURE ang ginaplano nga pag strike sa tion nga maglapse na ang cooling off period sa domingo.
Pero ginsiling ni Stefanie Montaner, presidente sang labor union sang CENECO, legal ang ila ginaplano nga pag untat trabaho sa pagpati nga may yara sang unfair labor practice kag union busting tuga man sang kapaslawan sang CENECO management sa pagpatuman sang mga nakasugtan sa Collective Bargaining Agreement.
Taliw-as ini sa ginpahayag ni Atty. Dennis Cortez, counsel sang CENECO management nga iligal ang plano nga pag-strike sang katapo sang CURE bangud sang “No strike clause” sa CBA.
Kabahin sa mga ginapanawagan sang CURE sa ila gin-issue nga notice of strike amo ang pagpatuman sang 5 percent increase sa bulanan nga sweldo para sa mga rank and file employees, signing bonus, loyalty bonus para sa mga empleyado nga makalab-ot sa 10 year service kag allowances.
Wala ini napatuman sang CENECO bangud wala nila nalab-ot ang 95 percent collection efficiency tuga man sang pandemic.
Sandig sa memorandum sang national electrification administration ginakinahanglan nila anay malab-ot ang 95 percent collection efficiency antes pa man sarang masugdan ang pagpatuman sang CBA.
Nagpabor ang management kag labor union sa assumption of jurisdiction sang Department of Labor and Employment.
Sini nga hapon ang hearing sang National Conciliation and Mediation Board upod sa katapo sang CURE kag tiglawas sang tagdumalahan sang CENECO.