Isa ka pamilya ang gin massacre sa Himamaylan City. Ginpaulanan sang tiro ang ila nga balay.
Nalakip sa mga napatay ang duha ka mga menor de edad nga kabataan. May naga bitay pa nga bangkay sang menor de edad sa puertahan, ang isa nagakatulog kay mag mga igo sang bala kag ang iloy nga si Imelda Fausto nagahamyang sa hagdanan sang balay.
Ini ang eksena nga naabtan sang Himamaylan PNP kaina sang aga sa Sitio Kalingking, Barangay Buenvista sa Himamaylan City.
Ini matapos nga ginpaulanan tiro sang kagab-i ang ila nga balay. Pensar anay sang mga residente sa palibot may encounter nga nag luntad sang kagab-i pero pagka-aga bangkay sang pamilya ang ila nga nasapwan.
Kaina sang aga, mga singkwenta metros gikan sa balay nasapwan ang bangkay sang padre de pamilya nga si Rolly Fausto sa talamnan sang mais.
Tanan nga mga biktima may mga igo sang bala sa lawas.
Natabuan nga wala sa ila nga balay ang isa ka bata nga babaye gani naka panugid ini sa mga pulis kaina sang aga sa gindangtan sang iya nga pamilya.
Suno sa kay Police Capt. Arturo Margallo, Jr., deputy chief sang Himamaylan PNP, wala pa gid sila sang may matumod nga suspek kag motibo sa krimen sa subong.
Sa impormasyon, taga Basay, Negros oriental ang pamilya kag bag-o lang nagsaylo sa amo nga lugar.
Padayon ang ginapatigayon nga pagpangusisa sang PNP sa natabo nga krimen.
“Nagkadto sa amon station si Emily Fausto, bata ni siya sang aton nga biktima nga si Imelda Fausto.
Nag-report siya nga alleging nga sang gab-i mga las 10 sang gab-i, June 14, 2023, ginpabalo siya sang iya nga tupad balay nga may nabatian ini nga nilukpanay sa balay sang iya ginikanan.
So mga las 11 ginkadtuan niya to ang balay sang iya ginikanan kag didto niya nakita ang iya iloy kag ang duha niya ka manghod nga patay na sa ila nga balay”, suno kay Margallo.