Seguridad sa Bacolod City Government Center ang mas ginpabaskog agud matapna ang away sang grupo sang mga pamatan-on.
Isa ka kutsilyo ang nabawi sang isa ka amay sa isa ka pamatan-on nga taga Barangay 41 sa Bacolod City Government Center sang Domingo sang gab-i.
Ginsiling ni retired Police General Primitivo Tabujara pamuno sang Public Order and Office mahimu nga may tension nga nagaluntad sa grupo sang mga pamatan-on nga nagakadto sa BCGC grounds.
Gani nagdugang na sila sang mga POSO guards nga magabantay sa palibot. Hugot man nga ipatuman ang curfew for minors sugod las dies sang gab-i.
Sang nagligad lang nga tuig isa ka 15 anyos nga lalaki ang napatay sa tubang sang BCGC sa nagluntad nga riot sa tunga sang grupo sang pamatan-on gikan sa Barangay 41 kag Taculing.