Agud mapasanyug ang programa sa paglubad sa problema sa trapiko, ginaduso sa konseho ang pagtukod sang Bacolod Traffic Department.
Suno kay Councilor Al Victor Espino, pamuno sang Committee on Transportation and Traffic sang konseho, kabahin sa sarang matagaan solusyon sa idalom sang ginaplano nga pagtukod sang Bacolod Traffic Department ang problema sa mga nagabyahe nga tricycle nga wala sang prangkisa.
Lakip man diri ang pagpasanyug sang iban pa nga programa para mapahagan-hagan ang pag gutok sang lakat sang trapiko sa siudad.
Sa ginadihon nga ordinansa, ilisan sang departamento ang natukod nga Bacolod Traffic Authority Office.
Samtang kabahin naman sa mga ginahikot sang konseho upod sa Bacolod Traffic Authority Council ang natalana nga pagpatuman sang towing kag clamping ordinance.
Ginahulat na lang sang konsheo ang proposal sang isa ka towing firm antes suguran ang towing kag clamping sang mga salakyan nga madakpan sa mga designated towing kag clamping zones sa siudad.