Cease and Desist Order iga-serbe sa isa pa ka property owner sa Barangay Punta Taytay nga nagagamit sang tinambak nga basura bilang filling material.
Sa technical conference ginpaathag sang landowner sa Barangay Sum-ag ang pagtampok sang basura bilang filling material sa iya propiedad sa kilid sang sapa.
Miyerkules sang ginserbe sa iya ang Cease and Desist Order sang City Legal Office upod ang katapo sang Bacolod Environment and Natural Resources Office kag City Engineer’s Office.
Ginsiling ni City Legal Officer Karol Joseph Chiu sarang mapasakaan sang kaso ang mismo hauler sang basura kag bisan ang property owner.
Sini nga Lunes sang hapon ginhanda sang City Legal Office ang separado nga Cease and Desist Order nga iga-serbe batuk sa isa pa ka property owner sa Barangay Punta Taytay nga pareho man nagpatampok sang basura sa iya sini nga duta.
Ginpaathag na ni BENRO head Ma. Fe Trespuentes nga indi pwede gamiton ang basura bilang filling material bangud sarang ini maglapta sa palibot ilabi na sa sapa.
Ginapat-ud pa sang siudad kun diin sa Barangay Mandalagan ginhakot ang mga basura pakadto sa Sum-ag kag Punta Taytay.
Ginmanduan na sang siudad ang mga property owners nga dapat kuhaon sa lugar ang ginpangtampok nga basura.