Good news ang pag approve sang substitute bill nga maga dihon sang Negros Island Region, pero ang pagtalakay sini sa Committee on Appropriations ang mangin mabudlay.
Ini suno kay Negros Occidental Governor Eugenio Jose Lacson nga nag pahayag nga ang pag approve sang House Committee on Local Government sang substitute bill para sa NIR ang preliminaries pa lamang, ukon kabahin sang nahauna nga mga tikang.
Pero suno kay Lacson importante sa karon nga ang pagduso sang NIR ang naga idog. Padayon nga naga laum si Lacson nga si Governor Roel Degamo ang maga kambyo sang iya nga panindugan kag maga suporta sang NIR. Natalana pa si Lacson mag sugilanon sa iya.
Sa interview sang media kay Rep Mercedes Alvarez sang Martes, iya gin siling nga wala sila nakabaton sang position paper ni Degamo nga damlag pa nag pahayag nga indi siya pabor sa NIR.
Mas mayo kuntani suno kay Alvarez kun ila nga nabaton ang position paper sini sang tion sang committee hearings.
Ang tatlo ka mga kongresista sang Negros Oriental ang naga suporta sa NIR kag suno kay Alvarez ang katapo man sang kongreso ang naga boto para sa pag pasar sini.