Pila ka mga lugar sakop sang 3rd, 4th, 5th, kag 6th District ang balantayan bangud sang mahimo nga pagsambuwa sa 2025 elections.
Suno kay Negros Occidental Governor Eugenio Jose Lacson, ang ginahulat sang coalition sang Love Negros kag Uinted Negros Alliance amo ang announcement sang UNEGA sang ila nga mangin manok para sa vice gubernatorial race. Damlag pa ginsiling ni Vice Governor Jeffrey Ferrer nga isa sa plano niya amo ang pagbalik sa 4th District bilang Congressional Representative karon nga maga tapos sang iya nga termino ang iya tiayon nga si Congresswoman Juliet Marie Ferrer. Suno kay Lacson, nasiling niya na nga siya ang maga pa reelect bilang gobernador para sa iya nga third term.
Balantayan ang 6th District suno sa iya.
“Sa 6th District, we’re not sure kun ang away sa congress or sa local, indi pa na sure, pero ang 6th District is also being watched”, suno kay Lacson.
Ang bahin sa congressional race, incumbent congresswoman karon si Mercedes Alvarez.
Damlag pa nagpabutyag sang interes sa congressional race si anay Hinoba-an Mayor Ernesto Estrao.
Ang mayoralty race sa Kabankalan sa 6th District ang gina paabot nga may pag kontrahanay sa gina huring-huring nga pagbalik sang mga Zayco.
“Kabankalan there will be a battle”, suno kay Lacson.
Sa fifth district naman gina siling nga may challenger si Congressman Dino Yulo gikan sa kampo sang mga Arroyo. Independent suno kay Lacson si Yulo. Ang Isabela Mayoralty race suno kay Lacson may mga istorya nga may pagsumbuwa sa tunga ni Vice Mayor Juan Miguel Montilla kag anak ni Congressman Yulo.
“Sa Fifth District, Parang isa lang ka LGU as of now ang daw may ara, I’m looking at Isabela”, suno kay Lacson.
Sa Fourth district naman suno kay Lacson ginapaabot nga may challenger si San Enrique Mayor Jilson Tubillara. May sambuwa man nga gina paabot sa Valladolid karon nga maga tapos na sang termino si Mayor Enrique Bebot Miravalles.
Ang Silay sa third District suno kay Lacson mahimo nga indi lamang one-on-one ang kontrahanay, gina paabot man ang sambuwa sa Talisay City.
Ginapaabot nga wala sang opposition sa First kag Second District. Sa tunga sang coalition, ginapaabot nga masunod ang equity of the incumbent kun indi maistoryahan ukon malikawan ang pag sungpunganay.