No facemask,no ride policy ginatugyan na sang LGU sa pribado nga operators sang tanan nga public transport ang pagpatuman sini sa Bacolod.
May libre nga facemask nga ginapanagtag sang katapo sang Public Order and Safety Office sa mga nagakadto sa Bacolod City Government Center.
Suno kay City Administrator Pacifico Maghari, III, magluwas nga gina require ang mga empleyado nga mag-face mask ginahaylo man nila ang mga nagakadto sa BCGC nga magsuksok sang face mask ilabi na karon nga nagasaka ang Covid 19 cases.
Si Mayor Albee Benitez nagsiling nga estriktohon man ang pagpatuman sang mandatory use sang facemask sa mga public transport kag sa health care facilities sandig sa Executive No.7 ni Presidente Ferdinand Marcos,Jr.
Gindugang man ni Atty. Maghari nga yara naman sa mga pribado nga kumpaniya ang estrikto nga pagpatuman sang no facemask, no ride policy sa mga jeepney kag bus terminal, seaport kag airport.
Kahapon una nga gin anunsyo ang mandatory nga pagsuksok sang face mask sa Bacolod pero gilayon man ini nga ginbawi kag ginpaathag sang siudad nga sa public transportation lang ini mandatory pati na sa mga health facilities.
Humalin Enero tubtob Abril 2023 nagalab-ot na sa 221 ang Covid 19 Cases. Walo diri ang napatay kun diin kalabanan sa ila mga unvaccinated.
Gani magluwas man sa paghanda sang temporary treatment and monitoring facility, pabaskugon man sang Emergency Operations Center ang pagpangbakuna, ilabi na sang booster shots para mas mapangapinan ang publiko sa balatian.