Nagakay-o sang motorsiklo ang 54-anyos nga livestock buyer sang siya ang ginpalapitan sang duha ka mga lalaki kag gintiro sa Sitio Makilo, Barangay Camansi sa Kabankalan City.
Nakaangkon sang igo sang bala ang biktima nga si alyas “Alberto” sa iya ulo kag likod. Ang obra sang biktima amo ang pagpamakal sang kasapatan kag isa man siya ka mekaniko.
Duha ka mga fired cartridges sang .45 caliber pistol ang narekober sa crime scene.
Antes sang insidente, nakabaton na ang biktima sang pagpamahog, suno sa iya bata.
Suno kay Police Lt. Col. Roberto Indiape Jr., hepe sang Kabankalan PNP, napatay sa engkwentro ang gin-alegar rebelde nga magulang sang biktima sa Barangay Camansi, sadtong 2022.
Samtang, gin-ako sang New People’s Army ang pagpatay kay alyas “Alberto” nga suno sa ila, amo mismo ang naghatag impormasyon sa Philippine Army agud patyon ang iya mismo utod kag isa pa ka upod sini.*