Mga opisyales sa probinsya ang naga pasalamat kag naga dayaw nga natigayon na pasar sa third and final reading sa senado ang Negros Island Region Bill.
Suno kay Senador JV Ejercito nga nag sponsor kag co-author sang hagna, sa pagpasar sini kahapon, mas nagalapit na gid ang katumanan sang Negros Island Region. Ang bill ang nagaduso sang pag revive liwat sang NIR nga gina tapuan sang Negros Occidental kag Oriental kag Siquijor suno kay Ejercito.
22 ka affirmative votes ang nakuha sang amo nga hagna kag wala sang negative votes kag abstention.
Para kay Senate President Juan Miguel Zubiri nga amo ang principal author sang bill, mas mapahapos na sa mga pumuluyo ang serbisyo sang gobyerno bangud indi na sila mag padulong pa sa regional offices sa Cebu ukon Iloilo.
Para kay Negros Occidental Governor Eugenio Jose Lacson ini katumanan sang promisa kag isa naman ka pag panghangkat nga alatubangon. Para kay Bacolod Mayor Albee Benitez isa ini ka milestone kag crucial step padulong sa regional progress.
Suno kay 3rd District Congressman Francisco Benitez ginduso ini sang mga tiglawas gikan sa Negros. Diutay na lang nga tikang kag mangin laye na ini nga naga kasayuran sang mas madasig nga delivery sang serbisyo kag maga hatag ligwa sang pag tin-ad pa gid.
Gina panginbulahan man nanday Congresswoman Juliet Marie Ferrer kag Mercedes Alvarez ang pag pasar sang hagna labi na nga malapit na ang katumanan sini. Para kay Bacolod Congressman Greg Gasataya ini isa ka game changer sa bahin sang pagdala sang serbiyo sa mga Bacolodnon kag Negrosanon.
Natalana naman magsapol ang Regional Development Council suno kay Mayor Albee nga amo ang chairperson agud istoryahan ang pagpahamtang sang mga regional sattelite offices.