Natalana nga pagpanagtag sang libre nga school supplies sa mga public school students sa Bacolod ang mahimo ma-delay sini nga school year.
Gin-ako ni Councilor Al Victor Espino, pamuno sang Committee on Education sang konseho sang Bacolod nga mahimo indi mapalab-ot ang mga libre nga school supplies sa mga public elementary students sa siudad dungan sa pagbukas sang klase sa madasun semana.
Ginpaathag ni Espino nga ang delay sa pagbakal sang mga school supplies ang tuga sang panibag-o nga guidelines nga ginapatuman may kaangtanan sa New Government Procurement Act ukon ang Republic Act 12009.
Halin sang Mayo, ginhikot na sang siudad ang mga tikang para sa natalana nga bidding process para masuguran ang pagbakal sang mga school supplies nga ipanagtag sa masobra 70,000 ka mga public elementary students.
Sa kabilugan nagalab-ot sa P32M ang gintalana nga pondo para sa school supplies.
Nalakip diri ang P15M gikan sa annual budget sang LGU kag P17M halin sa Special Education Fund.
Ang katapo sang Local School Board ang natalana magsapol para matigayon ang mga tikang para sa ginapaabot nga distribution sang mga libre nga school supplies.