Katapo sang Amlig Tubig nag-rally sa atubang sang Bacolod City Government Center agud ipanawagan ang pagkakas sang 12 percent value added tax sa balayran sa tubig. Wala na maka-pa picture ang pila ka mga bisita sa atubang sang fountain area sang Bacolod City Government Center matapos didto man nag-rally ang katapo sang Amlig Tubig.
Nakigsugilanon man ang katapo sang Public Order and Safety Office kag mga pulis sa ila. Pero nagpadayon gihapon ang ila pagtipon. Suno kay Fr. Chris Gonzalez, convenor sa grupo kag director sang Social Action Center, luyag nila nga ihinyo bilang regalo halin kay Mayor Albee Benitez ang pagkakas sang 12 percent nga VAT nga ginapatuman sang PrimeWater kag kun mahimu mabuligan sang alkalde ang 59 ka mga anay empleyado sang Baciwa nga ma-reinstate makaligad mapahalin tuga sang natukod nga joint venture.
Nagapati ang consumer group nga kasubong sang ginahimu nga tikang sang alkalde nga mapanubo ang bili sang kuryente, may ikasarang ini agud man mapanubo ang presyo sang supply sang tubig.