Paghimos sang mga spaghetti wires sa dalan Lacson liwat ginsuguran sang katapo sang Task Force Spaghetti wires sa Bacolod.
Nagbalik saka sa mga poste ang mga linemen sang telecommunications company para manglalas kag maghimos sang mga kable nga nagalinambod kag nagasablag sa dalanon sang Bacolod kaina sang aga.
Halin sa dalan Lizares kag Lacson Street ginlimpyohan nila ang ila mga linya pakadto sa Bacolod Public Plaza.
Ginsilling ni Councilor Pao Sy nga nagapamuno sang Task Force Spaghetti Wires, madako pa ang kinahanglan nga ulubrahon agud mahimos ang tanan nga mga spaghetti wires ukon ang mga nagalaylay kag nagalinambod nga kable sa siudad para man nga mabuhinan ang ginakabig eyesore sa mga dalanon.
Gani padayon ang iya panawagan sa mga telco kag bisan sa distribution utility nga tagaan atensyon ang kampanya nga nasuguran sang Benitez Administration.
Ginaduso na karon sa konseho ang ordinansa nga maga-require sa mga telco kag electric distribution utility nga magpatuman sang underground cabling system project para mapahagan-hagan ang kadamuon sang mga spaghetti wires.