Pasado na sa first reading ang ordinansa nga gin-duso ni Councilor Caesar Distrito nga magahatag sang libre nga school bags, school supplies kag PE Uniforms sa mga pampubliko nga secondary schools sa siudad kada tuig.
Lakip sa mga tuigan nga makabaton sang nasambit nga mga gamit sa eskwelahan, amo ang Grade 7 tubtob grade 12 students sa public schools.
Ginsiling man ni Distrito nga ila ginaduso nga mahatagan man sang mga libre nga gamit ang mga Bacolodnon students nga naga eskwela sa Negros Occidental High School.
Dugang niya, ang katuyuan sang ini nga ordinansa amo ang pagbulig sa pag pamag-an sang galastuhan sang mga ginikanan kag pag pasiguro nga ang mga estudyante may yara sang kagamitan.
Kun mapasar na sa Sanguniang Panlungsod ang ordinansa, natalana nga kuhaon ang pondo sa Special Education Fund ukon sa General Fund para sa amo nga proyekto.
Sa karun, ang ordinansa nga nagamando sang tuigan nga paghatag sang libre sang school bags kag school supplies sa Bacolod ang para lamang sa mga elementary students.
[sibwp_form id=1]