Ang Barangay Estefania sa Bacolod City ang magatalana sang tanod agud hugot mabantayan kag mapaiway ang paghaboy sang patay nga sapat sa sapa sa relocation site.
Buhi pa isa ka tutoy nga ginsulod sa sako kag ginhaboy sang wala makilal-an nga persona malapit lang sa taytay Purok Arao sakop sang Barangay Estefania.
Ang ido ang temporaryo nga ginsagod sang isa sa mga residente sa lugar.
Madumduman nga sa amo man nga taytay nakit-an sadto ang isa ka rider nga naghaboy sang ido sa sapa. Ugaling sang ginsaway siya sang mga residente iya ginkuha ang ido kag ginhigot agud maguyod sang iya motorsiklo.
Suno kay Punong Barangay Jerry Tingson sang Barangay Estefania, ila na gina usisa ang amo nga mga insidente.
Nagpasalig man siya nga magtalana sang tanod agud mag monitor sa lugar agud mapaiway ang paghaboy sang sapat ilabi na patay nga baboy sa sapa bangud man sang kahangawa tuga sang African Swine Fever.