May mga departament heads nga nagahinyo nga madugangan kag ma-reinstate ang pila sa mga napahalin nga job order workers. May mga bakanta nga pulungkuan sa pila ka mga opisina sa Bacolod City Government Center makaligad sang pagpangakas sang siudad sang mga job order workers.
Halin sa kapin 3,500 may 2,700 na lamang ang naga-serbe nga JO sa Bacolod sa pagsugod sang tuig 2023.
Pero indi malipod nga may pila ka mga departamento ang ginakulang gihapon sang job order workers kag may mga department heads nga naga-request nga kuntani mabalik ang mga JO nga malawig na kag amo ang masaligan sa serbisyo.
Ang City Legal Office Enforcement team kag DRRMO pila lang sa mga departments nga nagakinahanglan sang dugang nga personnel agud nga mangin epektibo ang ila pagserbisyo kada adlaw.
Suno kay City Administrator Pacifico Maghari III, ini karon ang ila gina-consider kadungan sa pag-validate sang performance sang mga bag-o gin-hire nga mga JO. Dugang pa niya nga indi man magduha-duha ang siudad nga kakason ang mga JO nga wala naga-perform sa ginhatag nga responsibilidad.