Kinaangdan na sang 29 anyos nga si Jerry Pabilona nga maglibot anay sa school campus sang La Consolacion College Bacolod antes magpauli kun hapon.
Natabuan man nga sang nagsaka siya sa 3rd floor nakita niya ang naga daba daba na nga kalayo.
Ang box nga nabutangan sang mga internet router ang nagakasunog.
Gin hingagaw niya tum-ok ang fire alarm button para ma alarma ang mga nabilin nga mga empleyado sa buidling.
Ginhingagaw niya man kuha ang fire extinguisher kag gin piswitan ang box nga naga kasunog nga nahulog na sa salog.
Bangud sang madamol nga aso nanaog na siya kag nangayo sang tabang kag nagpa tawag bombero. Pagsaka niya balik nag sugod na ang pag tubod sang tubig gikan sa sprinkler.
Pila lamang ka tikang gikan sa nagakasunog nga box ang 75 anyos nga building nila nga himo sa kahoy. Maswerte na lamang suno kay jerry nga wala maglab-ot diri ang kalayo.
Para kay Jerry importante nga sa kada pagsulod niya sa trabaho naga sugod siya sa pagpangamuyo kag wala siya nag panic sang matabo ang insidente.
Kaina liwat nga nag balik sa LCC ang mga katapo sang Bureau of Fire Protection para magpatigayon sang imbestigasyon sa kun ano gid ang ginhalinan sang kalayo.