QR code system sang Bacolod gina-recommend sang katapo sang Senado nga magamit agud matapna ang paglapta sang mga peke nga PWD IDs.
Base sa data sang Senate Committee on Ways and Means nagalab-ot sa masobra sa P88B ang gina kabig tax leakages nga natuga sang peke nga mga PWD IDs sa pungsod.
Gani sa ginpamunuan nga committee hearing ni Senator Sherwin Gatchalian iya gindayaw kag gina-recommend ang ginapatuman nga QR code system sang Bacolod LGU agud matapna ang paglapta sang mga peke nga PWD IDs.
Mismo si Mayor Albee Benitez nga nagserbe resource person sa hearing ang nagpatpat sang tikang kun paano napunggan sang LGU ang paglapta sang mga peke nga PWD IDs kag iban pa nga government issued documents paagi sa teknolohiya.
Ginpabugal sang alkalde nga paagi sa amo nga sistema nadula ang reklamo sang mga tagdumalahan sang mga commercial establishment sa siudad angut sa mga peke nga PWD IDs kag senior citizen IDs nga sadto anay ginpa-recall agud mailisan sang QR coded cards. Bisan si National Council on Disability Affairs Executive Director Glenda Relova ang nagpabutyag sang interes nga ma-kopya ang sistema sang Bacolod LGU.
Bukas man si Mayor Albee nga mapagamit sa iban pa nga LGU ang isa sa mga best practices sang siudad para matapna ang disbentaha nga natuga sang mga nagalapta nga fake PWD IDs kag documents sa pungsod.