Pag bungguanay sang pareho nga miembro sang United Negros Alliance sa duha ka mga banwa ang gina paabot.
Sa Agosto pa suno kay Cadiz City Mayor Salvador Escalante, nga naga serbe man Sec Gen sang UNegA, magasapol ang partido para maplastar ang tanan sa 2025 Elections.
Suno kay Escalante lakip sa ila nga talakayon ang gina paabot pag bungguanay sang upod man nila sa partido sa banwa sang Moises Padilla kag Binalbagan.
Iya ginasiling gina paabot ang pagsumpunganay ni Moises Padilla Mayor Ella Garcia-Yulo kag Vice Mayor Ian Villaflor sa mayoralty race.
Sa Binalbagan naman gina paabot suno sa iya ang pag challenge ni anay Mayor Emmanuel Aranda kay Mayor Alejandro Mirasol.
Katapo man si Aranda sang UNegA suno sa iya. Gina lantaw nila sa sini nga sitwasyon nga ang pinaka logical nga matabo amo ang pagkilala sang equity of the incumbent.
Samtang, si councilor Anejo Nicor naman sa banwa sang La Castellana ang gina paabot maga bulos sa iya utod, Mayor Rhummyla Nicor Mangilimutan nga yara na sa iya third term suno kay Escalante.
Lubos naman ang suporta sang partido kay Vice Governor Jeffrey Ferrer nga magabalik sa 4th district bilang congressman kag gina lantaw nga iga challenge ni retired DPWH Regional Director Engr Lea Definado.