Pagbulig sa mga apektado sang bagyo Odette nga makabangon liwat ang mangin isa sa prayoridad sang Negros Occidental.
Sa pinaka una nga department heads meeting sa 2022 ini ang gintalakay sang gobernador ilabi na sa Office of the Provincial Agriculturist kag Veterinarian.
Suno sa kay Governor Eugenio Jose Lacson dapat nga mabuligan ang mga mangunguma sa ano man nga ayuda nga mahatag sang mga national agencies – ini ayhan bulig pinansyal ukon mga interest free loans.
Ang OPA ang may pinaka daku nga gin-report nga kahalitan tuga sang bagyo Odette – masobra sa 4 billion pesos.
Suno kay Lacson ang mga livestock raisers buligan man nga makabalik liwat sa normal nga sitwasyon. Samtang, bangud naman sang pagsaka sang Covid-19 cases, magapabilin ang 4-day work week sa kapitolyo probinsyal.
Padayon pag nga gina talakay kun bala himuon nga mangin mandatory ang pagpabakuna sang mga empleyado, pero luyag anay pat-uron sang gobernador kun pila ang naga pabalin nga unvaccinated.
Wala pa man sang desisyon ang kapitolyo bahin sa indi pagtugot sa mga unvaccinated nga mag transaksyon ukon mag sulod sa kapitolyo.