Ginsugdan na ang pagbakuna sang Pfizer sa duha ka mga venue sa probinsya.
Sa Negros Residences nagpila para sa ila nga pagpabakuna ang halos 450 ka mga pumuluyo sang Talisay kag 200 gikan sa Silay.
May gikan man sa Hinigaran. Sa Teresita Lopez Jalandoni Provincial Hospital naman 340 ka mga pumuluyo sang Silay ang nakalista.
Sa masunod nga mga inadlaw naka schedule na ang pagbakuna sang mga pumuluyo gikan sa nagkalain lain nga LGU magluwas na lamang sa Biyernes nga para sa mga empleyado sang kapitolyo probinsyal sa idalom sang Barangay Kapitolyo vaccination program.
Natungod nga dululungan ang pag dala sang mga pumulyo sang LGU sa venue kag may mga temprano pa nga nag abot sang sa na-schedule nga vaccination, ang pila ang naglab-ot sagwa sang Negros Residences suno kay Dr. Ernell Tumimbang.
Ginapasiguro naman nga nasunod ang physical distancing.
Suno kay Atty Rayfrando Diaz, ang provincial administrator nangin maayo na ang performance sang probinsya sa vaccination roll out. Ang masobra sa 14,000 ka Sinovac vaccine nga damlag napangdul-ong sa LGU suno kay Tumimbang ang fully utilized na. Suno kay Diaz tungod sang maayo nga performance nahatagan sang dugang pa gid nga bakuna ang probinsya.
May 34,000 ka Sinovac vaccine nga ginapaabot subong nga semana.
May Moderna vaccine man nga gina paabot ang probinsya pero indi pa mapat-od kun san-o ini maga-abot. Kasubong sang Pfizer, kinahanglan sang ultra low storage facility ang Moderna.