Nagapabilin nga exempted sa gina-require nga negative RT-PCR test result ang mga government APOR ukon authorized person outside residence parehos na lang sang mga pulis kag iban pa nga mga empleyado sang gobyerno nga naga padulong sa iban nga probinsya bangud sang ila trabaho.
Pero ginaduso ni Councilor Renecito Novero sa Sangguniang Panlungsod nga kuntani ihinyo sa Inter Agency Task Force sang pag-require sa ila sang negative RT PCR test result upon travel agud mas mapabaskog ang tikang kontra sa paglapta sang Covid-19.
Ini ang suportado sang Emergency Operations Center karon nga nagasaka ang Covid-19 cases nga posible tuga sang Omicron variant kag iban pa nga variant of concern.
Na-endorso naman sang City Health Office ang rekomendasyon sa konseho para magdihon sang pagsulundan nga magadumili sa wala pa mabakunahan nga maka-gwa sa ila balay.
Suno kay Dr. Edwin Miraflor, officer in charge sang CHO, sandig man ini sa panugyan sang Inter Agency Task Force sa mga local government unit sa tuyo nga mapahagan-hagan ang pagsaka sang Covid-19 cases.