Pag pasar sang Kongreso sa hagna nga naga palawig sang term sang barangay kag Sangguniang Kabataan officials ang gina-abi abi sang barangay officials sa Bacolod.
Aprobado na sang Kongreso ang House Bill no 11287 nga nagaduso sa pagpalawig sang termino sang Barangay kag SK Officials sa anum ka tuig.
Gin-set ang two term limit para sa elective barangay officials kag one term naman para sa elective SK Officials.
Nakasaad man sa hagna ang pag postpone sang December 1, 2025 nga BSKE sa ika duha nga Lunes sang Mayo 2029.
May 153 ka mga kongresista ang nagboto pabor sa hagna, apat ang nagpamalabag samtang isa naman ang nag-abstain.
Kun ini ang madesisyonan sa natalana nga Bicameral Conference Committee kaupod ang katapo sang senado mahimo nga sa Disyembre 2029 na ang masunod nga Barangay kag SK elections.
Ang bersyon nga aprobado sang Senado amo ang pagpalawig sang termino sang mga elected barangay kg SK officials sa apat ka tuig nga may maximum nga three terms ukon 12 ka tuig.
Para kay Bacolod City Liga ng mga Barangay President Lady Gles Gonzales-Pallen sang Barangay Taculing, mas nagakaangay nga ma-postpone ang barangay election ilabi na nga tuman ka lip-ot sa mga newly-elected barangay kag SK Officials ang duha ka tuig nga termino.
Ini magluwas sa ginapaabot nga gasto kun madayon ang pinili-ay sini nga Disyembre.
Nagapati si Gonzales-Pallen nga mas madamo nga mga programa ang sarang matuman ilabi na sang mga performing elected barangay officials kun matigayon ang pagpalawig sang termino.
Ang Barangay Taculing pila lang sa mga barangay sa Bacolod nga nagbaton sang Seal of Good Local Governance bilang national passers halin sa Department of the Interior and Local Government.
Ano man nga bersyon ang makasugtan sang Kongreso kag Senado, nagapati sanday Singcang-Airport Punong Barangay Caesar Distrito kag Estefania Punong Barangay Jerry Tingson nga dapat ini ang matigayon antes pa man ang nagahilapit nga pinili-ay sa barangay.