Pag pang abuso ang naga panguna nga reklamo nga mabaton sang Overseas Workers Welfare Administration nga gina padangat sang mga OFW sa ila nga talatapan.
Paathag ni Rizza Joy Moldes, ang Officer-in-Charge sang OWWA Region 6, kalabanan sa mga OFW gikan sa rehiyon 6 ang yara sa elementary occupation ukon ang gina tawag nga low-semi skills, ehemplo diri mga domestic workers.
Sa mga kababainhan, labi na kun yara sila sa Middle East suno kay Moldes, pag pang-abuso ang naga panguna nga reklamo.
Ini ayhan verbal, physical ukon mental abuse. Naga sunod naman amo ang confiscation sang personal nga mga pagkabutang kag ikatlo ang non-payment ukon underpayment sang salaries and benefits.
Wala naman naga untat sa pag pahanumdom sila nga dapat mag transact lamang sa mga lehitimo kag lisensyado nga recruitment agency.
Wala untat naman ang serbisyo kag bulig sa mga OFWs suno kay Moldes.
Sa social insurance benefit humalin Enero tubtob Hunyo, 19 million pesos ang na release sa 172 ka mga benepisyaryo.
6.3 million pesos naman ang na release sa 630 ka benepisyaryo sa idalom sang Illness program.