Pag ginuwa sang mga lago sa pila ka mga uma sakop sang Sitio Puli kag Pandan sa Barangay Orong sa Kabankalan City sang nagliligad nga adlaw ang naka kuha atensyon sang pila ka mga netizen.
Sa post ni Regie Boyayot lima ka adlawa ang naka ligad, makit-an sa duta sa uma nga iya nakadtuan ang mga inagyan sang lago kag mismo ang mga lago nga naga kinamang.
Paathag ni Ricky Muscosa, ang City Agriculturist sang Kabankalan City nag ginanuwa ang mga lago gikan sa ila nga habitat ukon mga ilistaran bangud nga nadisturbo ini sang magsaka ang tubig sa suba dala sang bagyo Kristine.
Kahapon, Hwebes, nag padulong sa Barangay Orong ang team ni Muscosa upod ang tiglawas sang Provincial Agriculturist para ma usisa ini.
Sa kilid sang suba, sa may nataasan nga parte ukon may alluvial soil ukon mga natipon na nga duta nga naga lapad man sang isa ka ektariya naga istar ang mga lago.
Mahimo suno kay Muscosa diri sila naga istar bangud sang organic material diri.
Gani sang magsaka ang tubig sadto gikan sa suba dala sang malain nga panahon, nagsaylo ang mga lago.
Karon nga nag init naman, sila ang nagbalik liwat sa ila nga daan nga ilistaran.
Suno kay Muscosa, indi na ini bag-o para sa mga pumuluyo sang lugar bangud masami ini nagakatabo sa bulan sang Noyembre.
May mga 30 ka lago nga makita sa kada 10 square inch sang duta suno sa iya.
“Bale nagsaka sila sadto nga time sang gabagyo. Kay te malumos man ni sila mo kag maanod. Instinct man guro nila nga kun mataas ma transfer gid sila. Nagbalik na sila sa ila nga habitat. Actually damo gid, kay gin ukay namon, kay ginlantaw namon. Kada ukay mo, mo mga 10 x 10 inches damo gid”, suno kay Muscosa.