Hakutay sang basura sa Bacolod City apektado bangud ang tubig sa taytay padulong sa landfill sang siudad nag-awas.
Apektado sa karon ang operasyon sa paghakot sang basura sang IPM-CDC sa siudad sang Bacolod bangud sa pagbubo sang ulan humalin pa sang Lunes nga adlaw.
Ini base man sa announcement sang Bacolod City PIO.
Suno kay Ma. Fe Trespuentes, officer-in-charge sang Department of Public Services, nag-awas ang tubig sa taytay nga ginaagyan sang dumptruck padulong sa sanitary landfill sa Barangay Felisa bangud sa pagbaha.
Dugang pa niya, kalabanan sa mga driver kag manug hakot basura sang IPM-CDC ang wala man gani naka-duty bangud apektado man sang baha.
Sumugod sang kahapon may special operation ang IPM-CDC kag dose ka dalagko nga truck ang nagakuha sang basura sa mga main road nga ginakabig nga mga critical areas.
Nagapanawagan ang DPS sa publiko nga likawan anay ang pagpagwa sang basura kun naga bubo ang ulan bangud gina anod ini sang baha.