Councilor Celia Flor ginapaabot ang pag-adopt sang QR coded nga PWD, senior citizens Id sa mga LGU sa probinsya para mapaiway ang pagpamentaha sa mga commercial establishment.
Sa social media nagpalab-ot sang sentimiento ang management sang isa ka kalan-an sa Bacolod angut sa liwat nga pagpamentaha sang mga customer nga gina-alegar naga-gamit sang peke nga mga PWD kag senior citizens Id.
Ginsiling ni Councilor Celia Flor, pamuno sang Committee on Senior Citizens sang konseho, QR coded na ang halos tanan nga PWD kag senior citizens ID sa siudad.
Gani nagakaangay nga ma-verify sang tagdumalahan sang mga kalan-an kag iban pa nga commercial establishment ang mga IDs para makasiguro.
Ginapaabot man ni Flor nga ma-adopt sang iban pa nga LGU sa probinsya ang QR codes sa pag-issue sang PWD kag senior citizens ID agud mapaiway ang pagpamentaha sa mga commercial establishment.
Nagapanawan ang konsehal sa iban pa nga senior citizens nga wala pa maka-update sang ila IDs nga kun mahimo mapa-ilisan na ang ila daan nga IDs.