Pito ka adlaw matapos ang isa sa mga pinaka lala nga baha nga natabo sa Canetown Subdivision sa Barangay 19-A sa Victorias City ini ang sitwasyon sa barangay…
Naga tinumpok ang basura sa higad sang dalan, ang mga residente masako sa gihapon sa pagpang laba kag bulad sang mga nagkala basa nga mga pagkabutang.
Ang mga baligya nga nahalitan sang baha naga tangkas kag gina tinluan.
Ginpakita ni Evangeline Java ang naga tangkas niya sa gihapon nga lalabhan kag hinalay. Sa kada pag ulan gina traumatize na sila kuno sa subong.
Suno kay Punong Barangay Lucia Duran, nahangpan nila nga indi lang sila ang ginbaha sa Victorias gani indi madali dali kuha ang tanan nga basura sa ila nga barangay. Pati gani ang ila barangay hall nga gina construct ang apektado man kay ang mga semento nga gamiton sa constrtuction nagkala basa.
Sa pihak sang sitwasyon wala sila gakadulaan sang paglaum…
Kaina sang aga may mga relief goods gikan sa talatapan ni Senador Kiko Pangilinan nga ginpanagatag sa mga residente nga naga puyo sa higad mismo sang creek. Sa highway naman naga libot ang salakyan sang lgu kag naga dul-ong sang grocery packs sa gwa sang gate sang mga balay.
Suno sa punong barangay, kadamo na sang naga padayon nga naga padala sang bulig sa ila nga barangay kag may mga gikan sa pribado nga sector.
Pati ang mga fire trucks sang Cadiz City ang naga balik balik kada adlaw sa ila nga barangay para mabuligan tinlo ang mga lunang sa mga dalanon.
Naga laum ang mga residente nga sa indi madugay malampuwasan nila ang ini nga pagtilaw kag mangin mas mapag-on kag handa na sa ila sa pag atubang sa mga kalamidad.