Shadow

Paathag para sa mga naga plano magpinauli sa Negros Occidental sini nga bulan

Gin-aprubahan na sang Regional Inter-Agency Task Force ang ginpangayo sang probinsya sang Negros Occidental nga suspension sang pagpapauli sang mga locally stranded individuals sa probinsya sa Disyembre 24, 25 kag 31 pati na sa Enero uno.

Ini agud mahatagan sang ligwa ang mga banwa kag siudad nga makapaninlo kag disinfect sang ila mga quarantine facilities.

Magsiling kita nga LSI, ini sila ang mga persona nga yara sa iban nga probinsya sa pungsod nga luyag magpauli sa ila siudad ukon banwa.

Ini sila ang indi makasulod sa Negros Occidental sa ini nga mga petsa.

Wala diri nadala ang Bacolod nga isa ya ka highly urbanized city kag may separado kag kaugalingon nga local government.

Gani ang ini nga moratorium ang wala sang epekto sa mga pumuluyo sang Negros Occidental kundi para lang sa mga nagapinauli nga gikan sa iban nga probinsya.

May yara naman karon sang ginaduso ang Bacolod Emergency Operations Center nga pagbag-o sa mga requirements para sa tanan nga mga returning residents.

Nalakip na diri ang mga LSI kag pati mga nagapinauli gikan sa iban nga pungsod.

Ang protocol nga ginapatuman sa karon sang siudad amo nga kinahanglan pa nga magpaidalum sa swab test kag magtenir sa quarantine facility sang siudad ukon sa hotel ang mga returning residents sa ila pag abot sa Bacolod.

Ginaduso sang EOC nga kun may yara man lang sang negative RT-PCR result ang returning residents gikan sa lugar nga ila ginhalinan indi na sila kinahanglan ipa swab test liwat kag pateniron sa quarantine facility sa ila pag-abot sa Bacolod.

Magluwas nga makasiguro ang siudad nga negatibo na sila sa virus sa ila pagsulod sa bacolod, mahagan-hagan pa ang galastuhon sang siudad sa katorse nga adlaw nga nagatenir sila sa mga quarantine facility.

“They can go straight home without any need for testing, without any need for quarantine sigurado na sila makapuli kag kita naman sigurado kita nga wala kita may ginbaton nga positive indi na kita magduda, indi na kita mag test and that would save us some logistics as well ma save da sa aton sa siudad,” suno kay Em Ang, executive director sang Bacolod EOC.

Pero rekomendasyon pa lamang ini anay sang Bacolod EOC kag wala pa sang approval sang alkalde sang siudad gani indi pa karon mapatuman.

Leave a Reply

Your email address will not be published. Required fields are marked *

Secured By miniOrangeSecured By miniOrange