Duha ka miyembro sang Bugalon Drug Group ang nasikop sang katapo sang Bacolod City Drug Enforcement Unit sa buy-bust operation sa isa ka subdivision, sa Barangay Mandalagan, Bacolod City kagab-i.
Ginkilala ang mga gindakup nga sanday alyas “Tata Ramyr”, residente sang Bacolod kag alyas “Anthony”, residente sang Kabankalan City.
Nakuha sa ila ang 1,300 grams ukon 1.3 kilos sang ginasuspetsuhan shabu nga may standard drug price nga P8,840,000.
Pareho nga miyembro sang Bugalon Drug Group ang duha ka nadakpan, apang si alyas “Ramyr” ang ginakabig sang kapulisan nga “number one target-listed drug personality” sang Kabankalan.
Ginsiling ni Police Capt. Rosalino Pugoy, public information officer sang Bacolod City Police Office, naga-operate ang Bugalon Drug Group sa 5th kag 6th Districts sang Negros Occidental, lakip na ang Kabankalan kag Bacolod. Gina lantaw man nila nga plano kun tani ipasulod ang supply sang iligal nga droga para sa Sinulog sa Kabankalan.
Apesar nga nadakup ang lider sang drug group nga si Jing Bugalon sa Kabankalan sadtong Agosto 2022, suno kay Pugoy, may mga nabilin nga miyembro ang grupo nga nagapadayon sang illegal drug trade sa probinsya.*