P67M gin-pain sang Bacolod LGU para sa libre nga wifi kag dugang pa nga pondo para mapa kaayo ang mga public school facilities. Sa pagsugod sang distribution sang libre nga school supplies sa mga pampubliko nga eskwelahan sa Bacolod, gin-anunsyo ni Mayor Albee Benitez ang pagtalana sang P67M para sa installation sang libre man nga wifi sa mga school classrooms.
Ginsiling sang alkalde nga importante ang internet connection labi na sa mga buluthuan para mapasanyog pa ang kalidad sang edukasyon. Kabahin man sa ginadihon sang Bacolod LGU ang pagpain sang tig-P1M nga pondo sa kada public school sa siudad sa tuyo nga mapaayo ang school facilities kag iban pa. Suno kay Councilor Al Victor Espino, pamuno sang Committee on Education sang konseho, ang pondo halin sa Special Education Fund ang gamiton para ma-enhance ang utilization sang natalana nga budget allocation.