Supply na kun tani para sa Bacolod City MassKara Festival 2024 sa bulan sang Oktubre ang nakuha nga shabu sa isa ka lalaki nga imbolbado sa aksidente sa banwa sang Murcia.
Suno kay Police Lieutenant Colonel Antonio Benitez, Jr., head sang Bacolod City Drug enforcement Unit, yara sa idalom sang monitoring sang mga otoridad ang amo nga iligal nga droga sa siudad bangud sa impormasyon nga ginhatag sang isa sa mga nadakpan nga nagaduso sang illegal nga droga.
Wala pa matumod sang mga kapulisan kun diin nga lugar kuntani iga-deliver ang bulto sang ginapatihan shabu apang posible nga mangin kabahin na kuntani ini sang stock para sa palaabuton nga kahiwatan.
Ang nadakpan ang ginkilala nga si Carl John Arroyo, 29-anyos kag residente sang Purok Bayanihan, Barangay Villamonte, siudad sang Bacolod.
Nakuha sa iya ang kapin ₱6,800,000 nga balor sang ginapatihan shabu sa banwa sang Murcia sang Sabado sang aga.