Pagtukod sang P55M evacuation center kag multi-purpose building sang siudad sang Victorias sarang suguran sa Mayo.
Suno kay Victorias City Mayor Javi Benitez na-plastar na ang master plan para sa ginadihon nga construction sang Victorias City Evacuation Center kag multi-purpose building nga itukod sa Barangay 13.
Ang pondo nga P55M para sa proyekto ang maga gikan sa Local Government Support Fund.
Upod sa evacuation center nga mangin kabahin sang Victorias Global City ang igatukod man nga duha ka 10-storey building nga housing project sang siudad upod sa Department of Human Settlement and Urban Development.
May P600M ang pondo para sa 600 housing units para sa mga informal settlers kag government employees nga ipatuman paagi sa tripartite agreement sa tunga sang local government unit, DHSUD kag Pag-ibig.
Ang construction sang Sidlak Village ang ginalauman sang alkalde nga masuguran antes matapos ang tuig.