Amat amat na nga naganubo ang presyo sang bugas sa mga merkado sa Bacolod humalin sang ginsuguran sang siudad ang pag-facilitate sang supply sang barato nga bugas nga mabaligya man sang mga rice retailers sa tag P45 pesos ang kilo.
Sa karon may tag P42 naman nga kilo sang bugas nga mabakal sa Burgos Public Market.
Suno kay City Administrator Atty. Pacifico Maghari, III, plano sang siudad nga mag supply sang dugang nga 500 pa ka mga sako sang barato nga bugas sa mga rice retailers. Ini sa tuyo nga malab-ot ang tag-P41 pesos nga kilo sang bugas sunod sa Executive No. 39 ni Presidente Ferdinand Marcos, Jr.
Ginapaabot man ni Maghari nga sa madason nga sinemana nga mag-stabilize na ang presyo sang bugas sa mga merkado sa pagsulod sang supply sang local rice.
Samtang, maga-resume naman sa mga eskwelahan ang pagpanagtag sang tig duha ka kilo sang libre nga bugas halin sa Bacolod LGU para sa mga wala pa makakuha sang ayuda.
May masobra na 252,000 ka residente ang nakabaton sang ayuda sang nagligad nga weekend.
Target sang siudad nga makabaton sang ayuda ang masobra 300,000 nga mga Bacolodnon nga apektado man sang tinalikdan nga pagbaha.