Gindala na sang Bacolod City Police Office ang 337 ka mga karton sang iligal nga sigarilyo nga nakumpiska sa mga operation sang pulis kag ginpang surrender sa tagsa ka police station sa Bacolod City agud i-dispose sa Sanitary Landfill sa Barangay Felisa Miyerkules sang hapon.
Gikan sa anum ka mga police stations ang mga sigarilyo nga nagablor sa 38.78 million pesos. Ang Police Station 4 amo ang may pinakadako nga nakumpiska nga mga iligal nga sigarilyo nga nagdangat sa 21 million pesos kag ginsundan naman ini sang Station 6 nga may 16 million pesos.
Ginsiling BCPO Deputy City Director for Operations nga si Lieutenant Colonel Albart Tare, kalabanan sa mga nakumpiska nga sigarilyo ang resulta sang mga checkpoints kun sa diin wala sang mga dokumento gikan sa Bureau of Internal Revenue ukon BIR ang mga nagadala sini.
Indi man makabig nga peke ang sigarilyo, apang iligal ini bangud wala ini sang tax kag wala naglabay sa eksakto nga proseso.
Gin-shred sang kapulisan ang mga sigarilyo agud masiguro nga indi na ini mapuslan pa kag mabaligya.
Nahibaluan man nga ang ini nga mga brands sang sigarilyo ang masami ginabaligya sa mga tiangge.
[sibwp_form id=1]