Sa sini nga hayub hayub sa Purok Boulevard sa Barangay 13 sa Bacolod naga puyo si Showny Hermosura ang iya mister kag apat ka mga kabataan.
May hiligdaan lang sa ibabaw para maka igo sila tanan kun magtulog. Pulo na sila ka tuig nga naga puyo diri kay ang iya bana naga trabaho bilang kargador sa pantalan.
Aminado siya nga indi siya mahim-os nga basi dugay dugay pahalinon naman sila diri kay indi ila duta ang ila gina istaran.
Sang tion sang kampanya gin promisahan sila ni mayor elect Albee Benitez nga isaylo sila sa housing project kag gamay lang ang bayaran kada bulan.
Ini ang inisyal nga plano nga ipatukod nga housing project sang Benitez administration. Vertical, ukon pasaka. Ala condominium type. 2-3 stories ang kada bulding. 37 square meters ang kada unit kay pwede mabutang loft ukon second floor ang kada unit. 96 ka units sa kada building. May malapyad nga alagyan kag may mga hagdanan sa pihak kag pihak nga side sang building.
Suno kay Benitez, isa sa nakita nila nga lugar nga mauna patukuran sang housing project amo ang Boulevard bangud may propedad diri ang siudad.
Tinghuaan nila nga himuon ini nag barato lang kag masarangan sang mga informal settlers. Sang mahibaluan ni Showny nga diri sa ila lugar posible maga tindog ang housing project, excited siya nga maka balay na gid man sila nga ila gid gina panag-iyahan.
Dugang pa ni Benitez, maga isyu sila sang LGU bonds para maka tipon sang tatlo tubtob lima ka bilyon ka pesos para sa sini nga projekto.
Ang Joly Homes Foundation nga non government organization ang naga sugod naman sa pag libot sa bacolod kag gina pa intsindi ang posible nga mga benepisyaryo kun ano ang matabo kun mag enrol sila housing program sang siudad.
Suno pa kay Benitez, sigurado siya nga masuguran na ang ini nga proyekto sa una nga tuig sang iya pagpungko bilang mayor sang Bacolod.