Tunga sa kilo sang ginasuspetsuhan shabu nga may standard drug price nga P3,400,000 ang nakumpiskar sa ginpatigayon nga buy-bust operation sa Purok 4, Barangay San Miguel sa banwa sang Bacong, Negros Oriental, kaina Huwebes sang aga.
Dakup sa police operation si alyas “Cyrel”, 56-anyos residente sang Barangay Poblacion sa banwa sang Santa Catalina.
Nagpatigayon sang casing kag surveillance operations ang kapulisan matapos makabaton sang impormasyon nga si alyas “Cyrel” ang nagapakigbahin sa illegal drug trade.
Nakuha sa iya ang anum ka pakete sang ginasuspetsuhan shabu.
Suno kay Police Brigadier General Arnold Thomas Ibay, regional police director sang Negros ang pagkadakup ni “Cyrel” ang nagahatag sang klaro nga mensahe sa mga nagapakigbahin sa illegal drug activities nga ilisipon na lang ang ila mga inadlaw bangud suno sa iya, indi maga-untat ang kapulisan sa rehiyon sa pag-ayam sa ila.