Arestado sanday alias Ronilo kag alias Butch matapos makuhaan sang masobra dos milyones pesos nga balor sang shabu sa Brgy. Guadalupe sa San Carlos City sang Sabado sang aga.
Suno sa kay Police Major Ryan Villasario ang Deputy Chief of Police sang San Carlos City PNP, nagapatigayon sang validation ang mga kapulisan sa area angut sa posible presensya sang mga suspek sa likod sang pagpangransak sang isa ka mall sang bulan sang Agosto, nasitaan sang kapulisan ang duha ka mga persona kun ngaa ara sila sa lugar.
Sa padayon nga pagpangusisa sang kapulisan sa duha, gilayon nga naghunos sang pusil si Ronilo apang napauntat sang kapulisan kag gin aresto sila.
Nakuha sa ila ang duha ka mga cal. 45 pistol, mga magazine kag mga bala. Na recover man sang kapulisan ang 343.7 grams sang shabu nga nagabalor sang 2,337,160 pesos. Pasakaan sang kaso nga paghupot sang iligal nga droga kag pusil ang duha.
Suno sa PNP, wala sila sang kahilabtanan sa natabo nga pagransak sa mall.