Nagduda ang driver kag helper sang Isuzu 6-wheeler panel van bangud suno sa instruction sa ila, package ang ginkarga gikan sa warehouse, apang natingala sila nga may label sang brand sang sigarilyo ang karton nga gin-load sa truck.
Gani, ginpakamaayo nila nga dal-on ini kag i-surrender sa kapulisan sang Station 4 nga sa amo nga tion, nagapatigayon sang checkpoint operation sa dalan Circumferential, Purok Herbabuena, Barangay Villamonte sa Bacolod City, mga las 3 kaina sang kaagahon, Martes, Abril 14.
Gin-inform sang driver nga si alyas “Mario”, 27-anyos kag sang iya helper nga si alyas “Mark”, 20-anyos, pareho residente sang Brgy. Singcang-Airport sa Bacolod ang team leader sang pulis may angut sa ila karga.
Gin-hire ang duha sang wala pa makilal-an nga persona agud i-transport ang nasambit nga mga karton. Ila man ginpabalo ang ila employer, nga amo ang nagsugo sa ila nga magkadto sa Police Station 4.
Nakuha sa truck ang 215 ka boxes sang sigarilyo nga nagabalor P21,000,000.*
[sibwp_form id=1]