Kun matigayon na comply sang mga local government units ang mga required nga papeles gina lantaw nga sa masunod nga semana mangin available na ang 20 pesos nga kilo sang bugas sa idalom sang food security emergency program.
Paathag ni Engr Jose Albert Barrogo ang Agriculture NIR Director, nagahulat sila sang direction ni Sec Francisco Laurel, Jr. Sarang maka avail sang programa ang mga senior citizen, persons with disabilites, mga indigent kag ang yadtong sa idalom sang Pantawid Pamilyang Pilipino Program.
Tig napulo ka kilo sang bugas kada semana ang pwede nga mabakal sang kada pamilya.
Ang Food Terminal Incorporated ukon FTI ang magabakal sang bugas sa National Food Authority sa tig P33 pesos ang kilo.
Ang 13 pesos nga deperensya gikan selling price nga P20 pesos ang iga subsidize sang Department of Agriculture kag local government unit. Suno kay Barrogo ang LGU na ang magakuha sang bugas gikan sa NFA.
Sa karon ang Negros Occidental LGU kag Bacolod City ang mga LGU ang may pahanugot sa amo nga transaction para sa Negros Occidental.
Indi pa man mapat-od kun tubtob san-o magalawig ang programa pero sa inisyal nga plano ini ang tubtob sa 2028. Pasalig ni Barrogo nga ang bugas nga iga baligya ang zero to 3 months old. Ginabuligan nila sa karon ang LGU process sang papeles nga kinahanglanon upod sa Food Terminal Incorporated. Pioneer ang Visayas area sa programa.
“Ang target naton nga ma start depende sa kadasigon sang LGU sa pag comply sa documents sa FTI so naka depende sa ila. Gina assist man namon ang LGU para medyo mapa dasig-dasig naton. Hopefully ma target tani sini next week ma roll out na ini siya. Actually ang stocks naton sa NFA is available na. Ang bululigan lang gid is ang pag process sang papeles with the LGU and FTI”, suno kay Barrogo.