Sumatotal, 259 ka mga bales sang imported nga used clothing kag apparel ukon “ukay-ukay” ang nakumpiskar sa isa ka babaye sa Barangay Paniabonan, Mabinay sa Negros Oriental.
Bitbit ang search warrant, nagpadulong sa lugar ang katapo sang Criminal Investigation and Detection Group Negros Oriental Provincial Field Unit, upod ang PNP Maritime Unit Dumaguete, Huwebes sang hapon, Hulyo 24.
Nakuha sa lugar ang mga bales sang “ukay-ukay” nga may estimated market value nga P2.6 M. Wala ini sang mga permits, suno sa otoridad.
Magapangatubang ang gindakup sang kaso angut sa paglapas sang Republic Act 4653 ukon pagbaligya kag pag-distribute sang ukay-ukay.
Ginadumili sang laye ang commercial importation sang mga used clothing kag rags bilang paghalong sa ikaayong lawas sang mga tawo kag pagpabilin sang dignidad sang nasyon.
