Humalin sang ginsuguran ang mga ginakabig legacy projects sang Benitez Administration, ginabulubanta nagalab-ot na sa P2.5B ang na-release sang Bacolod LGU gikan sa P4.4B loan agreement.
Ginpahayag ni Councilor Thaddy Sayson, pamuno sang Committee on Finance sang konseho, kabahin sa mga proyekto nga na-releasan sang pondo ang construction sang Legislative Building, Bacolod City Health Medical complex, construction sang Old City Hall, mini hospitals, tree park kag ang pagbakal sang kapin 74 ektariya nga duta sa Barangay Granada para sa landbanking program.
Mahimo nga sa madasun nga binulan ma-amat amat release ang nabilin nga pondo gikan sa loan agreement para sa nabilin nga priority priority projects kaangay sang construction sang Bacolod Warehouse sang City Engineer’s Office sa Bredco property, tree park, command center project, dugang nga mini hospitals, solar power installation projects sa mga barangay kag ang Bacolod Integrated Recycling and Technology Hub nga natalana ang groundbreaking ceremony sa Miyerkules.