Indi magnubo sa isa ka milyon ka pesos ang ginagasto sang probinsya sa panyaga kag panihapon sang mga evacuees sang bulkan Kanlaon lakip na mga workers sa kada adlaw.
Suno kay Provincial Administrator Rayfrando Diaz, sa raw material lamang kaangay sa karne sang ayhan baboy ukon manok lakip na sa mga panakot para sa kada meal isa ka milyon ka pesos ang magasto sa isa ka adlaw.
Tig P50 ang gin budget para sa 10,000 ka mga palakan-on suno kay Diaz ukon P500,000 ang kagastuhan sa kada meal. Wala pa diri nalakip ang gina gasto sa labor. Sakop na sa budget nga napain sang probinsya ang sa sulod sang isa ka bulan nga pagtenir sang mga evacuees sa mga evacuation center.
Kun mag extend pa gid ang pag tenir sang mga evacuees kag madugangan pa gid ang iga evacuate kun matabo ang pag pasaka sa alert level 4 lain naman ini nga kagastuhanan.
Kahapon nag release sang P50 milyones pesos nga pondo ang Malacanang nga gina pasalamatan sang probinsya. Suno kay Diaz gina hulat pa ang guidelines bahin sa kun diin ang pondo sarang magasto lakip na ang iban pa gid nga mga pagsulundan.