Tuesday, November 17

P18M nga balor sang high grade marijuana nakuha sa 28 anyos sa Brgy. Tangub sa Bacolod

Ginabulubanta P18 milyones nga suspected high-grade marijuana kush halin sa Thailand, nakuha sa Bacolod. Ang ini nga sahi sang iligal nga droga ang masami ginagamit sang ‘rich kids’ suno sa PNP.

Yara sa 15 kilos ukon kapin P18 Million ang suspected high-grade marijuana kush nga nakumpiskar sang Bacolod City Drug Enforcement Unit sa Barangay Tangub, Bacolod City kaina sang aga.

Arestado sa anti-drug operation ang subject nga si alyas “Tol”, 29-anyos.

Ginsiling ni Police Lt. Col. Roberto Indiape Jr., pamuno sang CDEU, mga lima ka bulan ang ila monitoring sa subject tungod nagasaylo-saylo ini sang balay.

Suno kay Indiape, ginapaagi sa courier ang pagpadala sang suspected marijuana kush.

Base sa transaksyon, gikan sa Thailand ang nasambit nga iligal nga droga, gina-ship pakadto sa Manila antes i-distribute sa pila ka bahin sang Pilipinas, lakip na ang Bacolod, Iloilo kag pila ka lugar sa Negros.

Kung ikumpara sa shabu, mas barato, ang mga may sarang lang ang maka bakal kag indi masyado bal-anon nga isa ka iligal nga droga ang marijuana kush, suno kay Indiape.

Base sa standard price sang Philippine Drug Enforcement Agency, nagabalor P1,200 ang per gram sang high-grade kush.

Suno kay Indiape, ang kush isa ka high-grade nga marijuana, ini ang naka-pack na nga daan kag ready-to-use. Lain ini sa lokal nga mga dahon sang marijuana.

Mga ‘rich kid’, ukon may kaya nga mga pamatan-on ang target market ukon masami nga nagagamit sang nasambit nga iligal nga droga.

“Naga-transact sila sa shipping company. Ang parcel gina-order nila dira ginapadala. Then kung ara na, i-distribute naman na nila. Kay may suki siya ya nga delivery rider nga kung mag-abot ang package niya, ang delivery rider ya amo na ang nagakuha.. High grade ni siya kung baga naka-packaging na ni siya. Indi ni pareha sa mga local lang diri sa Negros or Bacolod nga mga dahon-dahon lang. Nga kung makit-an ara lang sa sulod sang posporo, ginalikit-likit lang. Ari ya naka-bricks na, ready to distribute, ready to use.. Sa information naton nga nakwa, kalabanan nga naga-deal sa ila mga pamatan-on man, kung baga mga sosyal kag may mga kaya.. Almost 5 months man ang monitoring namon. Grabe ang ila business, kay ti damo man sang ila customer nga nakasaho man. Mas dasig siya nga i-dispose siguro kay indi siya masyado halata compared sa shabu. Kay kung maghambal ta nga shabu, puti siya ya, crystalized. Ari ya masal-an mo lang nga ordinaryo lang. Indi ka magduda kung may mabilin nga amo na nga bagay kay ang iban indi man kakilala,” suno kay Indiape.

[sibwp_form id=1]
Secured By miniOrangeSecured By miniOrange